MAITE FRANKO ZULOAGA ETXEAN

Datorren asteazkenean, urtarrilak 30, Zuloaga Etxean, 18:00etan, Maite Franko ipuin kontalaria kontu kontari arituko da. Saioa 4-7 urte bitarteko haurrei zuzenduta dago.

 

IPUINA.EUS ATARI DIGITALA

Ipuina.eus webgune berria aurkeztu dute.

Koldo Izagirreren ekimenez sortu da proiektua; hark egin du ipuinen bilketa eta gaurkotze lana. Susa argitaletxearen bultzadarekin jarri dute martxan webgunea.

Hogeitabat ipuinekin abiatu da Ipuina.eus, baina ezarian-ezarian elikatzen joatea da asmoa; bizpahiru ale gehituz hilero. Hiru atal nagusi ditu: ipuinak, autoreak eta kronologia. Baina ipuinak biltzea eta nolabait testuinguru batean kokatzea du xede. Idazleak argitu du proiektuaren helburua ez dela  antologia bat osatzea ezta sailkapen bat egitea ere.

Izagirrek webguneko sarreran azaltzen du zer den ipuina.eus eta zertarako sortu den. Testu horretatik ateratako bi aipamen hemen:  "...Tradizioa beti laguntzeko prest daukan fantasia librea da ipuina, nolabait, ipuin literarioa. Laburra izanik, malgutasun handia du haurren, ume kozkorren, nerabeen, gazteen eta helduen artean mugitzeko. Adinen artekotasun horrek hainbat gai, hainbat estilo eta hainbat ikuspuntu lantzeko aukera eman ohi dio ipuinari..."

"...Narrazio laburra gure literaturaren zati garrantzitsua da, baina ez mereziko lukeen bezain hedatua irakurleen artean. Ihes egiten die definizio akademikoei, hibrido bat dugu, batetik bestera dabil sartu-irten fabulan, kronikan, artikuluan, gutunean edo oroitzapenean."

Iturria: Berria.eus

2019AN DOMEINU PUBLIKORA PASA DIREN ARTE-LANAK

Urte berriarekin, jabetza publikora arte-lan berriak igarotzen dira. Europako herrialde gehienek, 70 urteko epea dute egilea hiltzen denetik bere obra jabetza publikora igaro arte.

Literatura, musika, zinea eta pinturarekin zerikusia duten lan esanguratsu asko bihurtuko dira jabetza publikokoak, Xataka.com webgunean plazaratu duten zerrendan ikus daitekeen eran.

Zinemari dagokionez, Charlie Chaplinen Erromesa (The Pilgrim), Buster Keatonen Hospitalitatearen Legea (Our Hospitality) filmak edo Felix katua marrazki bizidunak esaterako.

Literaturaren arloan, Sigmund Freuden Ni-a eta hura (Das Ich und das Es), Virginia Woolfen Dalloway anderea (Mrs. Dalloway), Felix Salten Banbi edo Agatha Christieren Roger Ackroyden Hilketa eta Golf zelaiko hilketa bezalako titulu ezagunak.

Pinturarekin zerikusia dutenen artean, Kandinskyren Zarte Spannung, Henri Matissen Odaliska beso altxatuekin eta Marcel Duchampen Aitabitxiek biluztutako emaztegaia obrak besteak beste.

Musikaren kasuan, 1923an oso famatu egin zen Charleston  jazz-kantua eta Jazzaren garapenerako garrantzitsua izan zen Jelly Roll Mortonen King Porter Stomp abestia dira izenburu esanguratsuenetarikoak.

MAITE FRANKO KONTU KONTARI

Jon den ostiralean Maite Franko izan genuen Bordarin hirugarren mailakoekin kontu kontari. Ele, dar-dar, irri, antzerki, txalo... denetik izan genuen. 2019 urtea umoretsu hasi dugu eta horrela jarraitu nahi dugu. 

Saioen hainbat irudi ondorengo bideoan bildu ditugu. 

Eskerrik asko Maite! 

URTE BERRI ON 2019!

AGUR UDAZKENA, KAIXO NEGUA

Gaur, abenduak 21, San Tomas Eguna, Gabonetako opor hasiera eta negu hasiera ospatuko ditugu.

Ipar hemisferioan, udazkenari agur esango diogu gaur, 23:23an hasiko da ofizialki urtaro berria. Neguak 88 egun eta 23 ordu iraungo du, 2019ko martxoaren 20ra arte. 

Neguko solstizioa urteko egunik laburrena eta gaurik luzeena da. Eguerdian Eguzkia urteko punturik baxuenera iristen da eta hemendik aurrera, gauak pixkanaka laburtzen joango dira, eta argi orduak nagusituko dira.

Ipar poloan, Eguzkia ez da ateratzen egun osoan, 24 orduko gaua izaten da, eta egoera hori zenbait egunez luzatzen da.

Hego hemisferioan, ekainaren 21-22an gertatzen da neguko solstizioa. 
 

                                                                  Rob Gonsalves-en irudia

SUPERTALAIA 1

Hau sorpresa gaur goizean! Egunkari berri bat jaso dugu eskolan: SUPERTALAIA.
4. mailako ikasle talde batek egindako lanaren emaitza da SUPERTALAIA berripapera.  
Nerea Sorzabal, Nikole Zuzaya, Naia Ibargoyen, Inza Iraola eta Jare Sanz dira SUPERKAZETARI sortzaileak. Eskolako egunkari bat egiteko gogoa zuten, eta hara!, ekin eta asmoa egi bihurtu! 

Zorionak, boskote!!

IRAKUR GIDAK: GABONAK 2018

Gabonetako oporrak gainean ditugula, liburu gida batzuk partekatu nahi ditugu zuekin.

Gida horietako bat, Gipuzkoako Eskola Liburutegietatik jasotako liburu gomendio txiki bat da. Bigarrena aldiz, Debagoieneko Udal Liburutegietatik luzatutako proposamena da. Bietan, adinka sailkatuta, euskaraz eta gaztelaniaz argitaratutako liburuak daude.

Gida osoa hemen

Gida osoa hemen

Horiekin batera, duela bi hilabete, Mondragon Unibertsitateak argitaratutako Haur eta Gazte Literatura Irakur Gida 2017 hona ekarri dugu lagungarri izan dezakelakoan liburuak irakurtzeko edo oparitzeko aukeratzeko garaian.
Gida, lan talde baten lanaren emaitza da. 2017. urtean euskaraz argitaratutako liburuak irakurri eta aztertu ondoren osatutakoa. Liburuen zerrenda orokorraren ondoren sailkapen bat egiten da: liburu gomendagarriak eta oso gomendagarriak. Azken horiei erreseina bat gehitzen zaie. Bestalde, agertzen den adina orientagarria besterik ez da, bilakaera erritmoak, haurren zaletasunak, etab. sailkaezinak baitira.

Gida ikusteko irudian sakatu

ASTE HONETAN HONDARRIBIAN

Asteazkenean, abenduak 12, 19:30ean Kultur Etxeko (Denda kalea) 103 gelan Maite Darcelesek bere lehen eleberria, Bihotzean daramagun mundua (Alberdania), aurkeztuko digu, Yoseba Peña idazleak bideratuko duen solasaldiaren bidez.

Programa osoa hemen

XXIV. Euskal Liburu eta Disko Azoka.

Abenduaren 13tik 16ra Arrantzale Auzoan urteroko zita izango dugu. 

Ostegunean, 12:00etan, Udaletxeko Areto Nagusian, azokaren aurkezpena egingo da eta Mariasun Landa idazleak, Hondarribi saria jasoko du. 

Asteburuan, Jon Arretxe idazlea liburuak sinatzen egongo da azokan. 

53. DURANGOKO AZOKA. DA!

Kulturaren plaza martxan da. Gaur hasi da eta bost egunez, abenduaren 9ra arte, kulturaz gozatzeko aukera dugu. 

Aurten, aniztasunarena da antolaitzaileek nabarmendu nahi izan duten ideia: euskal kulturaren oparotasunean, artisten profilean, azokara biltzen diren herritarren ezaugarrietan, azoka bizitzeko moduan eta abarretan ikusten den aniztasunean. Eta hortik dator leloa ere: DA! Asko dira!

Kulturzaleek 200 ekitaldiz osatutako egitarauaz gozatu ahal izango dute Azokako zazpi guneetan. 439 nobedade izango dira bertan: 304 liburu, 93 disko, 18 aldizkari eta abar.

Unean uneko egitaraua eta sortzaileen sinadura-ordutegiak www.durangokoazoka.eus webgunean kontsultatu daitezke egunero.

Berria.eus

EUSKARALDIA ETA EUSKARAREN EGUNA

Aurreko egunetan Euskaraldia eta Euskararen Eguna dela eta, programa zabala eta ekimen dezente izan ditugu Talaian, Euskal Herriko eta munduko beste bazter askotan bezala. 

Eskolan eta kalean, Haur Hezkuntzako, Lehen Hezkuntzako, DBHko ikasle, irakasle, guraso... elkarrekin ibili gara: argazkiak atera ditugu, dantzak ikasi ditugu, puzzleak osatu, elkarrizketarako eta hausnartzeko tarteak hartu ditugu, telebista saio bat egin dugu, irratsaio bereziak, kalean mezuak banatu ditugu...

Ekimenari bukaera emateko, abenduaren 3an, Euskararen Egunean, arratsaldez, musika eta dantza izan dira protagonista gurean: Biterin Txantxariak izan ditugu eta Bordarin karaokeak eta trikitrilariek azken txanpa girotu eta alaitu dute.

LITERAKTUM 2018

Literaktum edizio berri bat abian da Donostian. Azaroaren 13tik 24ra egitarau zabala izango du

jaialdiak, literatur zaleei eta hain zale ez direnei ere eskainia. Literaturaren izen ezagunak beraien lanak aurkeztera etorriko dira, eta egungo gaiei buruzko solasaldietan gonbidatu esanguratsuak egongo dira.

Literaktum jaialdiaren gai nagusiak, berriz, ondorengoak izango dira: nobela eta historiaren arteko harremana, utopiaren indarra –eta haren itzal distopikoak– eta liburu ilustratua. Horri erantsi behar zaizkio literaturaren eta beste diziplina batzuen arteko uztarketak ere: gastronomiarekin, musikarekin, zinemarekin, pentsamenduarekin, kazetaritzarekin edo komikiarekin.

Solasaldien artean, Literaturaren bide berriak II: Gazteak eta irakurketa aurkitu dugu. Nola zaletu gazteak irakurtzera? Ez da gai berria, baina gaurkotasuna gordetzen du oraindik ere, eta irakasle, liburuzain zein guraso askoren erronka da. Galderaren inguruan Uxue Alberdi idazlearekin batera hausnarketa egingo dute hiru solaskidek: Imanol Epelde irakasle eta blogaria, Maialen Berasategi kazetaria eta Larraitz Idarreta liburuzaina. 

Ekitaldia euskaraz izango da, Donostiako San Jeronimo ekitaldi arteoan, azaroaren 20an, 19:30ean. 

Literaktum jaialdiko jarduera guztiak irekiak dira, jarlekuak bete arte.

Programa osoa xehetasun gehiagorekin, Literaktum jaialdiaren webgunean ikus daiteke.

SOLASALDIA KULTUR ETXEAN

Hondarribiko Liburutegiak antolatutako Mary Shelley-ren Frankenstein 200 urte zatiak josten egitasmoaren barruan ostegun honetan, azaroak 8, zikloaren azken solasaldia izango da:

“Frankenstein ikonoa arte plastikoetan eta zineman”.

Solaskideak, Koldo Almandoz eta Begoña Vicario zinemagileak izango dira. 
Ekitaldia, 19:00etan Kultur Etxeko 103 aretoan.

GAU BELTZA, ARIMEN GAUA, HALLOWEEN...

Izen asko dituzte gaur gaueko jaiek: Gau Beltza, Arimen Gaua, Halloween... Jaime Altunak eta Josu Ozaitak, jai horiek aztertu dituzte, umeen eta aiton-amonen bizipenak oinarri hartuta. 

Juan San Martin beka jaso zuten, 2015ean; hemezortzi hilabetez aritu dira ikertzen eta egindako lana, "Itzalitako kalabazen berpiztea" liburuan jaso dute. 

"Joan etorriko jai bat da" dio Jaime Altunak Bidasoako Hitzan jasotako elkarrizketa interesgarri honetan. 

Sosa ala pota!...

"GELTOKIAN KONTATUTAKOAK" IPUIN KONTAKETA MUSIKATUA

Bihar asteazkena, urriaren 31, Santu guztien bezpera, arratsaldeko 18:30ean, Ameli eta Xirrikituen jostunek heriotzari buruzko  ipuin kontaketa musikatua eskainiko dute.  

"Geltokian kontatutakoak"ekitaldia Zuloaga Etxean izango da eta 12 urtetik gorako gazteei eta helduei zuzenduta dago. 

BI EKITALDIREN BERRI

Gaur, asteazkena, urriak 24, eta bihar, urriak 25, izango diren bi ekitaldiren berri eman nahi dizuegu.

Gaur, Blagan euskara elkarteak antolatuta, Kultur Etxean (Denda kalea), arratsaldeko 7etan, Eneko Bidegainek Lurraldea eta herria liburua aurkeztuko du.  

Bihar, leku berean, 103 aretoan, Frankenstein, 200 urte zatiak josten zikloaren barruan, Frankenstein, munstroak eta literatura solasaldia izango da. Solaskideak, Juan Carlos Alonso psikologoa eta Iñigo Errasti itzultzailea izango dira. Ekitaldia 19:00etan izango da.

URRIAREN 24A, LIBURUTEGIAREN EGUNA

1997tik urriaren 24an Liburutegiaren Eguna ospatzen da gizartea irakurketaren garrantziaz kontzientziatzeko eta haur eta gazteengan ohitura hori bultzatzeko helburuarekin. Aldi berean, liburuzainek egiten duten lana aitortzeko modu bat da. 

Asociación Española de Amigos del Libro Infantil y Juvenil elkartearen ekimenez sortu zen Eguna. Aurtengo kartela Alfonso Zafico ilustratzaileak egin du eta pregoia, Gonzalo Moure idazleak idatzi du.


PREGOIA

EL DÍA DE LA LUZ

Vengo del desierto del Sáhara, de inaugurar una biblioteca. Está en Dajla, el más alejado, el más olvidado de los cinco campamentos saharauis. Es la cuarta biblioteca que construimos, y es preciosa. En el centro hemos plantado árboles, para que los niños y los jóvenes del Sáhara puedan experimentar el gozo de sentarse a su sombra a leer un libro. No queremos que esa biblioteca sea ningún "templo de silencio", sino más bien un espacio para el sonido, para el ruido. Una biblioteca que ya es el lugar más hermoso del campamento. Un espacio para desear ir a buscar lectura, pero tambiénamistad, sueños compartidos.
>>Segi irakurtzen

EUSKARALDIA, 11 EGUN EUSKARAZ

Euskarak 365 egun herritarren hizkuntza-ohituretan eragiteko egitasmoa da, herritarrak euskararekiko aktibatu nahi dituena. Hondarribian 2016an egindako kale neurketan euskararen erabilera eskasa eman zen, %24. Denon esku dago datu hori hobetzea.

Asmo hori dela eta, 2018ko azaroaren 23tik abenduaren 3ra Euskaraldia, 11 egun euskaraz ekimena gauzatu nahi da Hondarribian, Euskal Herriko beste herri askorekin batera.

Herritarrei eskatuko zaie bere hizkuntza portaerak aldatzea, euskara gehiago erabiliz edo aukera emanez. Horretarako bi figura sortu dira: ahobiziak, euskal hiztunak, eta belarriprestak, euskaraz gutxi jakin arren ulertzeko eta elkarrizketa bat ele bitan eramateko gai dena.
Hiru modu daude Hondarribian izena emateko: BAZ bulegoan (udaletxeko arkupeak), Euskara Udal Zerbitzuan (Pampinot kalea), eta euskaraldia.eus webgunean.

Hori bai, erabileran erronka ezin da 11 egunetara mugatu, urteko 365 egunetan presente eduki beharreko gaia da.

LIBURU BERRIAK

Erabateko martxa hartzea pittin bat kosta egin bazaigu ere, urriaren bigarren astetik, astero-astero, 3. mailatik hasi eta 6. maila bitarteko ikasle-taldeak mediatekara etortzen ari dira. Ikasturte osoan irakaslearekin astean behin etortzeko aukera izango dute.
Jolasgaraian eta jangela orduan, aldiz, bere kabuz etor daitezke.

Erabiltzaile berriek, 3. mailako ikasle direnak, mediatekako erabilera ederki asko ikasi dute eta zale asko ditugu dagoeneko horien artean. Segi horrela!!

Azken hilean liburu berri dezente jaso ditugu liburutegian. Horietako batzuk hemen dituzu:

FRANKENSTEIN 200 URTE ZATIAK JOSTEN

 

Mary Shelleyren FRANKENSTEIN 200 urte zatiak josten izeneko zikloa abiatu du Hondarribiko Zuloaga Etxea liburutegiak. Joan den astean honen berri eman genuen eta oraingoan egitaraua aurkeztu nahi dizuegu. Filmak, haurrentzako jarduera eta tailerrak, solasaldiak, erakusketa... programa zabala eta erakargarria iruditu zaigu.

IKUSI HEMEN EGITARAU OSOA  

Erakusketa abuztuaren 30ean zabaldu bazuten ere, gainontzeko ekitaldietako lehena urriaren 4 ostegunerako programatu dute. Egun horretan Kultur Etxeko areto nagusian James Whale zuzendariaren Frankenstein (1931) proiektatuko dute 19:00etan, jatorrizko bertsioan eta gaztelaniazko azpitituluekin.

Emanaldi eta jarduera guztiak DOAKOAK dira, lekuak bete arte. Zenbaitetan aldez aurretik izena ematea beharrezkoa da, izartxo batekin markatuta daude (*). 

Izena emateko:  943111285 edo liburutegia@hondarribia.eus helbidean

ZORIONAK JUAN KRUZ IGERABIDE!

Adunako Juan Kruz Igerabide idazleari Abezedario titirijario (Letren txotxongiloa) lanagatik eman diote Espainiako Haur eta Literatura Saria. Epaimahiak Igerabidek liburuan erabilitako hizkuntza poetikoa nabarmendu du, euskal ahozko tradizioaz gain, umore absurdoa bikain erabiltzen duela aipatuz.

Euskaraz argitaratutako lana katalanera (Abecedari pipiridari), galiziera (Abecedario monicredario) eta gaztelaniara (Abecedario titiridario) itzuli dute. Sari honetan 2017ko argitalpenak saritzen dituzte.

Saritutako liburuaren laburpena: 

Letren “txotxongiloa” erakusten digu liburuak, eta, emanaldi bat izango balitz bezala, letra guztiak agertzen dira, banan-banan, bai letra larriarekin, bai letra xehe lotuarekin. Letra bakoitzari bi orrialde eskaintzen zaizkio, ezkerretara letraren aurkezpena dator, eskuinetara bi poema. Liburuak zuhaitzaren irudia baliatu du testuak aurkezteko eta uztartzeko; hain zuzen, abezedarioaren letrak zuhaitzaren adarretan zintzilik, “poesiaren haize leunak kulunkaturik”.

Ilustrazioak letra bakoitzaren aurkezpenarekin eta poesiarekin uztartuta daude. Batzuetan, aurpegia baino ez dute letrek; beste batzuetan letra osoa eraldatzen da.  Iturria: Galtzagorri Elkartea

UDAZKENA HEMEN DUGU!

Maori Sakai-ren ilustrazioa

Iruditu ez arren, gaur hasten da udazkena. Ofizialki, igande honetan, irailak 23, 03:54an hasi da udazkena, Ipar hemisferioan. Urtaro hau 89 egunez eta 20 orduz luzatuko da, abenduaren 21ean neguan sartuko baikara. 

Eguzki orduak gutxitzen joango dira hemendik aurrera. Urtero gertatzen den bezala, eguzki-orduak eta gauak denbora bera irauten dutenean hasten da udazkena, baina urtearen arabera egun hori aldatu daiteke. 

 Ongi etorri eta irakurketa koloretsuak ekarri!

FRANKENSTEIN, 200 URTE

Aurten "Frankenstein" klasikoa argitaratu zela bigarren mendeurrena ospatzen da.

Mary Shelley

Mary Shelley idazleak, 1816. urtean sortu zuen "Frankenstein", 18 urte baino ez zituela. Bi urte geroago, 1818an, argitaratu zuen eleberria "Frankenstein edo Prometeo Modernoa" izenburuarekin.

1816ko udan, Lord Byronek Percy Bysshe Shelley poeta eta bere emaztea, Mary, gonbidatu zituen Suitzako bere udako etxera. Egun ekaiztsuak izan ziren eta etxean zeudela, Byronek mamu inguruko kontakizun bana sortzea proposatu zien gonbidatuei. Erronka hartatik sortu zen Frankenstein-en istorioa.

Mary Shelley-ren "Frankenstein" protagonista izango da Hondarribiko Zuloaga Etxean urtea amaitu arte.

 

“Frankenstein edo Prometeo Modernoa” eleberriaren argitalpenaren 200. urteurrenaren harira, Udal Liburutegiak jarduera egitarau zabala antolatu du datorren hiruhilekorako: film emanaldiak, solasaldiak, haurrentzako tailerrak, erakusleihoak atontzeko egitasmoa, etab… Berria irakurri

2018-2019 IKASTURTEA HASI DA!

Hementxe gara berriro ere! 

Irakurketa interesgarriz jositako ikasturte ederra izatea desio dugu.

ONGI ETORRI!!!

"OLATUEK EKARRITAKO ISTORIOAK"

Liburuaren Egunaren inguruan sortutako lana duzue hemen. Ondorengo liburuxkan agertzen dena etxeetan egindako lan guztien lagin bat besterik ez da, gelako hiruzpalau testu besterik ez baitaude.

Parte hartze bikaina izan da, MILA ESKER GUZTIOI!!

Olatuek ekarritako istorioak

Read more publications on Calaméo

DIPLOMA BANAKETA

Atzo, ekainak 21, mediatekan bildu genituen eskolako irakurlerik hoberenak. Gelaz gela atera ditugu izenak zerrenda osatzeko. Beraien artean "Irakurle-onenak" (maila osokoak) eta "Irakurle-onak" (gela bakoitzekoak) ipini ditugu.
Hauek izan dira sarituak:

ZORIONAK GUZTIEI ETA SEGI HORRELA!!

EZ GALDU IRAKURTZEKO OHITURA!

IRAKURLEE IRAKURKETA GIDA. UDA 2018

Ikusi/Deskargatu

Aurten ere, Donostiako Udal Liburutegien sareak, bere ohiko irakurketa gida argitaratu du, udan ere irakurtzera animatuz.

Adin guztientzako gomendio literarioak topatuko dituzue.

120 izenburu bildu ditu, paperean irakurtzen dutenentzat, liburu elektronikoak irakurtzea nahiago dutenentzat. Euskaraz eta gaztelaniaz, eta adin taldeen arabera antolatuak daude.

Izenburuak Sareko Liburutegietan dituzue eskuragarri. Euskarri digitalean daudenak, e-liburutegian  http://www.eliburutegia.euskadi.eus, eskuratzeko aukera dago. 

 "Irakurketaren plazera ez da naturala; bai, ordea, amets egiteko eta imajinatzeko dugun premia. Hortaz, haurrak, gazteak eta baita helduak ere irakurtzera animatzen ditugunean, haienganatu egiten dira hitz idatzietan gordeta dauden sentimenduak, lilura eta grina... "                                                                                                     (Kepa Osoro)

                                  

"GU ERE BERTSOTAN" JAIALDIA

"Gu ere bertsotan" jaialdia egingo dute bihar, ekainak 7, osteguna, Hondartza kiroldegian, Hondarribiko 4. eta 5. mailetako ikasleek. Egiluze, Ama Guadalupekoa eta Talaiako ikasleek, ikasturtean zehar landutakoa erakusteko aukera izango dute egingo dituzten saioetan. 

Ahozkotasuna eta bertsolaritza proiektuaren barruko jarduera da. Gure eskolan, Gipuzkoako Bertsozale elkarteko Ander Lizarraldek jardun du irakasleekin batera proiektua lantzen. 

Biharko emanaldirako ikasleek aukeratu dituzte gaiak eta taldeka bertsoak sortu dituzte. 

Emanaldia, bi saiotan banatuko da. Lehendabizi 4. mailakoak arituko dira, 17:15ean hasita. Ondoren, 5. mailakoen txanda izango da, 18:30etik aurrera. 

 Jai bikaina antolatu dute eta ezin huts egin!!

ESKOLAKO JAIALDIA

Maiatzaren 26an, Bordarin, Talaia eskolako Guraso Elkarteak antolatua, eskolako Jaialdia ospatuko da. Kirolak, jolasak, mendaria eta Maider Zabalegiren kontzertua izango dira. 

Larunbaterako plan ederra, animatu zaitezte!!

JON ARRETXE ESKOLAN

Jon Arretxe idazlea Bordariko mediatekan izan zen joan den asteazkenean, maiatzak 16, 6. mailako ikasleekin.

Aldez aurretik, arrakasta handia izan duen "Beti iparralderantz" (Erein) liburua gogotsu irakurri dugu. Elkarrizketa aberatsak sortu dira Afrika eta etorkinen gaiaren inguruan.

Solasaldiaren lehenengo partean, idazleak liburua idazteko oinarri hartu zuen bidaiaren argazkiak erakutsi zizkigun  eta pertsonaien nondik norakoak azaldu. Afrikako hainbat muga zeharkatu genituen, Drissa protagonistak egin bezala: Mali, Aljeria, basamortua, Maroko eta azkenik itsas artea pasatu eta Bermeora iritsi ginen.  

Azalpenaren ondoren, neska-mutilak egindako galdera guztiei jator erantzun zien, Jon Arretxek. Saioa bukatzeko, liburuak sinatu zituen. 

Erein argitaletxeko Edurneri esker antolatu ditugu saioak.

Mila-mila esker Jon, eskainitako hiru saio interesgarri eta aberats horiengatik. 

JON ARRETXE BORDARIKO MEDIATEKAN by Slidely Slideshow