IPUIN KONTARI: MAITE FRANKO

Bihar asteazkena, martxoak 21, Udal Liburutegian Ipuin Kontari saio berri bat izango da. Oraingoan, Maite Franko arituko da 4-7 urte bitarteko haurrentzat kontu-kontari.

ANTTON KAZABON BORDARIN

Antton Kazabon idazlea eskolan izan da 4. mailako ikasleekin. Bere hiru liburu irakurri ondoren, idazlea hurbiletik ezagutzea eta entzutea, guztiontzat oso esperientzia aberasgarria izan da.

Hiru saio oparo egin ditu gurekin. Ikasleen hitzetan, "saio txistoso eta dibertigarriak izan dira"; galdera-erantzunak, txisteak, asmakizunak, bertsoak, aho-korapiloak... tartea izan dute solasaldi hauetan. Anttonen maleta oso betea zegoen!!              

                                   ESKOLARA ETORRI ZEN

                                   IDAZLE SUPER ON

                                   BERE IZENA HAU DA

                                   ANTTON KAZABON

                                                               4.E

Eskerrik asko Antton!

ANTTON KAZABON 2018

UDAL LIBURUTEGIRA OTSAILEAN EGINDAKO BISITAK

Lehen Hezkuntzako ikasleek otsailean Udal Liburutegira bisitak egiten jarraitu zuten.

 
 
 

1., 2. eta 5. mailako ikasleek Zuloaga Etxeko berrikuntzak ezagutzeko aukera izan zuten bisitaldi horietan. Bertako arduradunek eraikineko gela guztiak (erabiltzaileentzat itxita egoten diren horiek ere!) eta funtzionamendua erakutsi zizkieten.

Urtarrila eta otsailean, 313 ikasle pasa dira Liburutegitik. Hemendik eskerrik beroenak luzatu nahi 

dizkiegu bisita atsegin eta interesgarri horiek egitea ahalbideratu duten guztiei.

Eskerrik asko Kote, Izaskun, Nekane eta talde osoari!!

ZERGATIK EMAKUMEAREN EGUNA MARTXOAREN 8AN?

Bihar, martxoak 8, Emakumearen Nazioarteko Eguna izango da. Ondorengo bideoan egun horretan zergatik ospatzen den, labur bilduta, ikus dezakezue.

EUSKARA ZINE ARETOTARA, TINKO. MARTXOKO PROGRAMAZIOA

Martxoan, Hondarribiko Haur eta Lehen Hezkuntzako ikasleek, Itsas Etxea Auditoriumean, "Euskara zine aretotara, Tinko" programaren barruan, ondoko pelikula hauek ikusteko aukera izango dute:

• Martxoaren 1ean, Tarzan, 5. mailako ikasleentzat
  
• Martxoaren 6an, Tarzan,  6. mailakoentzat
• Martxoaren 14an, Koko 2 Dragoi txikia, Haur Hezkuntzako 4 eta 5 urteko ikasleentzat

Hondarribiko ikastetxeetako Lehen eta Haur Hezkuntzako ikasleentzat euskarazko zinea eskaintzea da helburua, Udalak ikasleentzat antolatzen diren jarduera pedagogikoen barne. 

PELIKULEN SINOPSIAK

Afrikako oihanera egindako espedizio batean, munduko arazo energetikoa konponduko duen mineral baten bila ari diren John Greystoke eta bere emaztea helikoptero istripu batean hiltzen dira. Beraien seme txiki J.J. (Tarzan) bakarrik ateratzen da bizirik. Gorila talde batek haurra aurkitzen du eta beraiena balitz bezala onartzen dute, oihaneko lege gogorrak irakatsiz. Ikasitakoa praktikan jarri beharko du Tarzanek, handitzean bere oihana gizaki maltzurrengandik defendatu beharko du eta. Safari animatu ikusgarria paisaia exotiko bizi-bizian, Tarzan akzioz beteriko bidaia ederra da bikainki irudikatutako mundu batean. Film honetan, Edgar Rice Burroughsen pertsonaiari bizia emateko, lehenengoz erabiltzen da motioncapture teknika Natura eta animaliak babestearen garrantzia transmititzen du filmak. 

Koko dragoitxo maitagarriaren abenturen bigarren zatia da film hau. Koko eta Oskar kanpotarrak dira Dragoi uhartean. Koko, hegan egiterik ez duen dragoi-hegalaria da; Oskar, berriz, barazkijalea bihurtzea erabaki duen haragijalea. Bi lagunek izugarrizko abenturak biziko dituzte Matilda arantzurdearekin; hirurek, abenturaz abentura forma eta tamaina ezberdinetako dragoiak ezagutuko dituzte.  

Txikienentzat film aproposa, kolore biziko animazio zoragarri bat ikusiz adiskidetasuna eta talde lana bezalako baloreak jasotzeko aproposa.

LIBURUTEGITIK JAUZI EGIN DUTE!

Mediatekako apaletatik jauzi egin eta pozik dabiltza elurretan hauek ere!

IPUIN KONTARI UDAL LIBURUTEGIAN

Aste honetan bi Ipuin Kontari saio izango dira Udal Liburutegian:

Otsailaren 28an, asteazkena, 18:00etan, Lupe Lekuona arituko da 4-7 urte bitartekoentzat kontu-kontari.

Bigarren saioa, ingelesezko ipuin kontaketa izango da. Larunbatean, martxoak 3, 11.00etan, Elena Mosquera kontalariak, 0-6 urte bitarteko haurrentzat Moana ipuina kontatuko du. Lehen aldia izango da Hondarribiko Udal Liburutegian ingelesezko ipuin kontaketa bat egiten dena.

KOMIKI BAT: WALUK

Gutxi dira euskaraz argitaratutako komikiak eta gutxiago haurrrentzat eginikoak; horregatik, pozik jaso dugu Astiberri komiki-etxe bilbotarrak kaleratutako Waluk komikia.

Waluk, hartz zuri txiki bat, amak bakarrik utzi ondoren, hartz zahar erretxin batekin elkartuko da bizitzan aurrera egin ahal izateko. Eskimok, hartz zaharrak, bizitzaren gorabeherei aurre egiten irakatsiko dio.

Sentimenduz betetako eta adin guztietarako komikia ondu zuten 2011n Emilio Ruiz gidoilariak eta Ana Miralles marazkigileak eta orain euskaraz dugu.

 

Waluk-i buruz, Argia astekarian, Hartz-kumearen abenturak irakurri dezakezue gehiago jakiteko.

Bukatzeko, euskal komikigintzari buruz aipamen bat:

Olatua hartu du komikigintzak zioen, otsailaren 25ean, Berrian, Miren Garatek idatzitako artikuluaren titularrak. Bertan, Mikel Begoña komikilariak, aipatzen du: "... Hor bazegoen mito bat: komikia umeentzako gauza bat zela, baina gainditu zen hori, eta orain umeentzat baino komiki gehiago ateratzen dira helduentzat" .  Ea txanpa on bat hartzen duen euskal komikigintzak eta umeentzako argitalpenak ugaritzen diren!

 
 

ASTEBURURAKO BI IKUSKIZUN

Asteburu honetan familian gozatzeko bi ikuskizun dituzue hementxe:

Hondarribiko Itsas Etxea Auditoriumean, Famili zinema programaren barruan, "Oihaneko kuadrila" pelikula proiektatuko dute larunbatean. 

Familia osoarentzako egokia den film honek oihanaren bihotzean bidegabekeriaren aurka borroka egiten duten animalien talde baten historia kontatzen du. Maurice tigre boteretsua dela uste duen pinguinoa da. Alboan izango ditu Junior semea, tigre-arraina, Miguel, gorila indartsu eta maitagarria, eta Batricia, iluntasunari beldur dion saguzarra. 

           LEKUA: Itsas Etxea Audioturiuma

           ORDUA: 18:00

           IRAUPENA: 97´

           SARRERA: 3€

Eta Irunen, Amaia Kultur Zentroan, "Printze txikia" txotxongilo klasikoaren emanaldia izango da, Txotxongilo taldearen eskutik.     

Oso urrutitik, asteroide zk. 612-tik hain zuzen ere, gizon txiki bat, Printze Txiki bat etorri zaigu hau uler arazteko: begiek,batzutan engainatzen gaituzte, bainabihotzak ez du inoiz gezurrik esaten. Honek goxo-goxo hauxe dio: gauzak, pertsonak, arrosak, politak dira, maite baditugu batez ere.
Ipuin eder honek, musika berezia eta ederra eskatzen du. Horregatik Anne Landak bere eskusoinuarekin, egile hauen musika eskeiniko digu: Mendelssohn, Uruñuela, Zolotariev, Mozart, eta Bach. Opari bat musikazale eta antzerkizale guztientzat.

                                                             LEKUA: Amaia Kultur Zentroa

                                                             ORDUA: 17:00

                                                             IRAUPENA: 50´

                                                             SARRERA: 4,30€

                                  

TALDEAN IPUINAK IRAKURTZEN

Mediatekan egiten diren jardueren artean, taldean irakurtzea da horietako bat. 3. mailako ikasleek, irakasleok aukeratutako ipuin klasiko bat etxean prestatu eta besteen aurrean irakurtzen dute. Testua, 4-5 ikasleen artean lantzen dute.

Urtarrilean hasi ziren ekintza honekin eta gogotsu ari dira. 

Orain arte irakurritako ipuinak hauek izan dira:

"Elurretako erregina", "Hiru hiruleak", "Sinbad marinela", "Urrezko arrautzak erruten zituen oiloa" eta "Erpurutxo".

Saioen bukaeran esker ona emateko eta hobetzen laguntzeko proposamenak egiteko aukera izaten dute.  

ARANTXA URRETABIZKAIAREKIN SOLASALDIA

Blagan Hondarribiko Euskara Elkarteak antolatuta, otsailaren 21ean, asteazkena, Kultur Etxean (Denda kalea), Arantxa Urretabizkaiarekin  Bidean ikasia (Pamiela, 2016) liburuaren inguruan solasaldia izango da. 

Idazleak Euskarazko saiakeraren Euskadi literatura saria 2017 jaso zuen liburu honengatik. 

INAUTERIAK

Iñauteriak hemen ditugu! Mozorroak prest? 

 

Simona Ceccarelliren irudia

Hondarribian, beste herri askotan bezala, gaur hasi eta astearte bitarte inauteriak ospatuko dira. 

Eskolan bihar, otsailak 9, ostiral mehe, jolas, dantza eta parodia ugari izango ditugu. Herrian aldiz, ekitaldi nagusienak asteburuan burutuko dira. 

 

Euskal inauteriak urtarrilarekin batera hasi ziren hainbat herritan. Data nagusiak, berriz, otsailaren hasieran dira. Inguruko herrietako ospakizunak eta ohiturak ezagutzeko interesa baduzue, inauterietako "oinarrizko egutegia" Dantzan atarian aurkitu dezakezue. Inauteriei buruzko gainontzeko informazioa, argazkiak eta bideoak ikusteko jo dantzazaleen atarira.

 Ondo pasa inauteriak!!

EUSKADIKO IRAKURKETA PLANA

 Iturria: Irekia

Hezkuntza sailak Euskadiko Irakurketa Plana aurkeztu berria du. Cristina Uriartek aurkeztu zuen joan den asteazkenean, urtarrilaren 31n. 

Ekimen honen helburua da gure ikasleen irakurmena hobetzea eta haien artean irakurzaletasuna bultzatzea.

Irakurketa Planaren barruan webgune bat garatu dute. Irakurgunea deritzo eta eduki guztiak jasotzeaz gain, ikastetxeek burutzen dituzten jardueren ekarpenekin osatu eta aberastu daiteke. Familiei zuzenduriko gune bat gehitzea ere aurreikusten da, irakurketarekin zerikusia duten gomendioak, ekimenak edo iradokizunak jasotzeko.

                                             Euskadiko Irakurketa Plana webgunea

MAITE FRANKO ESKOLAN IPUIN KONTARI

Maite Franko Bordarin izan dugu kontu-kontari.
Bidasoaldeko ipuin kontalari eta idazlea 3. eta 5. mailako ikasleekin aritu da azken bi astetan. Neska-mutilak ederki pasa dute Maitek kontatutako ipuinak entzun eta antzezten.

Bihar, urtarrilaren 31, beste aukera bat izango da herrian bere kontakizunak entzuteko. Saioa, Zuloaga Etxean izango da, 18:00etan. 

LIBURU BERRIAK

Azken hilabetean mediatekan jasotako liburu batzuk ekarri ditugu hona. Zuen zain daude!!

LIBURU BERRIAK 2018KO URTARRILA

EUSKARALDIA!

2018an erronka berria dugu Hondarribian!

Hilaren 25ean, osteguna, hitzaldia emango du Kike Amonarrizek Itsas Etxean, 18:00etan. Bertan azalduko ditu Euskaraldia, 11 egun euskaraz iniziatibaren nondik norakoak.  

Ideia nagusia, Amonarrizek aurreratu du: "Herritarren hizkuntza-ohituretan eragiteko egitasmoa da, herritarrak euskararekiko aktibatuko dituena, Eusko Jaurlaritzatik eta Hondarribiko Udaletik Blagan Elkartearen laguntzaz bultzatuko dena. Hondarribian 2016an egindako kale neurketan euskararen erabilera eskasa eman zen, %24. Denon esku dago datu hori hobetzea, ekin diezaiogun bada gaurtik aurrera".

 

UDAL LIBURUTEGIRA BISITA

 

Duela egun batzuk 6. mailako ikasleek Zuloaga Etxea Udal Liburutegira bisita egin zuten.

Liburutegi berritua ezagutu zuten liburuzainaren gidaritzapean eta interes handiarekin jarraitu zituzten bere azalpenak. 

Izaskunek ederki azaldu zizkien bertan egindako aldaketak, espazio bakoitzaren erabilera eta eskaintzen dituzten zerbitzuak.

Liburutegiko arauak eta liburuak ordenatzeko erabiltzen diren irizpideak, gure eskola liburutegian ditugunaren antzekoak, jakinarazi zizkien. 

 

Zenbait ikaslek mailegua egiteko aprobetxatu zuten eta beste batzuk erabiltzaile txartela egiteko inprimakiak jaso zituzten.

Ziur gaude bere kabuz sarritan itzuliko direla, bai horixe!

Galtzagorri: «Haur eta Gazte Literaturaren inguruan eragile izaten jarraitzea gustatuko litzaiguke»

Galtzagorri Elkarteak mende laurdena baino gehiago darama haur eta gazteen irakurzaletasuna sustatzen. Bere helburua Euskal Haur eta Gazte Literatura ezagutaraztea ez ezik, sektorea bultzatzen laguntzea ere bada. Honen adibide, urtarrilaren amaieran Iruñean antolatu duten Biko-teka tailerra.

Galtzagorriren nondik norakoa eta lana ezagutzeko Kulturklik webgunean Iñaki Markotegiri, elkarteko zuzendariari, eta Izaskun Jauregiri, idazkari teknikoari, egindako elkarrizketa mamitsua irakurtzera gonbidatzen zaituztegu.

"... gure hainbat proiektu ahaztuta gelditzea gustatuko litzaiguke, horrek adieraziko lukeelako irakurzaletasunaren inguruan gaur egun oso zabalduta ez dauden ohiturak eta jarrerak jaur eta gazteen ingurune naturalean (eskoletan, familian...) orokortuta leudekeela..."

Elkarrizketa osoa hemen irakurri dezakezu.

10. ELKAR ILUSTRAZIO ETA IPUIN LEHIAKETA

10. urtez, elkar Fundazioak Ilustrazio eta Ipuin lehiaketa abian jarri du haurren eta gazteen artean irakurzaletasuna eta sormena bultzatzeko  helburuarekin. Horretarako hiru modalitate antolatu dira, haur eta gazteen adinaren arabera:

• Ipuina ilustratu
• Ilustrazioa ipuin bihurtu
• Komikia edo bineta sortu  

Pello Añorga eta Elena Odriozolaren laguntza izan du aurten.

Lan guztiak apirilaren 9a baino lehen aurkeztu beharko dira.  

Informazio osoa iturriaren webgunean irakurri. Iturria: Elkar

 

JOXAN ARTZE GOGOAN

Ostiralean zendu zen Joxanton Artze sortzaile handia. Bere hitzak bide desberdinetatik ezagutu ditugu: ikusiz, entzunez, irakurriz... eta gure barnean geratu, askotan bereak direla jakin gabe ere.  

Kantua kantu denean

kantaria ez da ikusten,

kantuak du ezkutatzen...

Usurbilen jaio zen 1939. urtean eta bertan bizi zen. Euskal literaturan ezinbesteko tokia du, forman berriztapen handia ekarri baitzuten haren poemek, liburua artelan bihurtuta.

Kantagintzari auspoa eman zion besteak beste Ez dok Amairu-ren bidez. Baga, Biga, Higa ikuskizunaren suspertzailea izan zen. Antzerkia, dantza, poemen errezitaldia eta kantua bateratzen zituen ikuskariak. Poesia oholtza gainera eramaten jarraitu zuen ondoren prestatutako beste ikuskizun batzuekin.

Ez dok amairu taldea desegin zenean, bere anaia Jesus, Jose Mari Zabala eta Mikel Laboarekin batera, musika, dantza eta poesia batzen zituen Ikimilikiliklik (1974) egitasmoa abiarazi zuen. Luis de Pablorekin, berriz,  Zurezko Olerki kontzertua prestatu zuen. 

Anaia Jesus Marirekin batera, txalaparta hauts artetik atereaz instrumentu garaikide bihurtu zuen. Txalaparta-diskoak eta bere poemak ere grabatu zituen Zurezko olerkia.

  

Poesia lanetan abangoardista izan da. Hamar liburu kaleratu zituen Artzek: Isturitzetik Tolosan barru,  Zumetarekin lankidetzan argitaratutako ...laino guzien azpitik... eta ...sasi guztien gainetik..., ...bide bazterrean hi eta ni kantari..., Ortzia lorez, besteak beste.

 Susa argitaletxeak haren antologia bat prestatu zuen XX.mendeko poesia kaierak bilduman.  

 "Poesia ez da hitzetan bakarrik bukatzen. Ezer ez da bere baitan bukatzen. Dena dago bata bestearekin harreman estuan, bai harri koxkor bat eguzkiarekin, eta eguzkia azken belar izpiarekin, edo errekako ur tantarekin. Denak dik bata bestearen bilatzen hori!"

Lotura honetan duzue Hasier Etxeberriak Sautrela programarako, 2007ko ekainean, Artzeri egin zion elkarrizketa interesgarria.

Kantuz ezagun diren poemak  

"Hizkuntza bat ez da galtzen ez dakitenek ikasten ez dutelako,

   dakitenek hitzegiten ez dutelako baizik"  

Joxan Artze

HAURREI ZUZENDUTAKO ALDIZKARIAK

Behinola aldizkariaren 36. zenbakian (2017ko abendua), haurrei zuzendutako aldizkarien gomendio batzuk egiten dira.

Gustavo Puertari, ¡La leche! aldizkariaren editoreari, egindako elkarrizketa interesgarriaren amaieran, haurrei zuzendutako hainbat aldizkarien erreferentzia-fitxak eskaintzen dizkigute. Aukeratutako argitalpenak gure merkatuan eta gure merkatutik kanpo aurkitu ditzakegu. 

Honekin batera, gaur egun gure Eskolako Liburutegian eskuragarri ditugun aldizkariak hementxe dituzue:

Euskaraz:

* IRRIA aldizkaria / Irrien Lagunak Kluba (2010) 

   Maiztasuna: Hilabetekaria 

   Adina: 4+ urte

* KARRAMARRO TXIKI: gozatzeko aldizkaria
  Amorebieta-Etxano: IKA Kultur Alkartea (2004)

  Maiztasuna: Hiruhilabetekaria

* KARRAMARRO: gazteen aldizkaria
 Amorebieta-Etxano: IKA Kultur Alkartea (2004)

 Maiztasuna: Hiruhilabetekaria

  
 
* KARRAMARRO Digitalak  hemen deskargatu daitezke.

Gaztelaniaz: 

* LEO-LEO / Madrid: Bayard Revistas, 1986- 

    Periodicidad: Mensual

    Edad: 7-10 años

* REPORTERO DOC: la revista que te descubre el mundo
  Madrid: Bayard Revistas, 1994-

  Periodicidad: Mensual

  Edad: 9+ años

  

KAIXO 2018!

URTE BERRI ON TALAIA ESKOLA LIBURUTEGIKO IRAKURLE GUZTIEI!!

 Mónica Carreteroren ilustrazioa  

2018 honetan liburuak bidean lagun izaten jarraitzea desio dugu. 

Urte zoragarria izan dezazuela aukeraz josia.

 

BEGEL IRAKURKETA GIDA GABONETARAKO

Gabonei begira Gipuzkoako Eskola Liburutegiak (BEGEL) argitaratutako Irakurketa Gida jaso dugu. Haurrentzat eta gurasoentzat hainbat proposamen aurkitu ditzakegu bertan. Irudian klikatu gomendioak ezagutzeko.

HONDARRIBIKO LIBURU ETA DISKA AZOKA

Abenduaren 14tik 17ra, Arrantzale auzoan, Liburu eta Diska Azoka izango da. Bertan Durangon aurkeztu berri diren nobedadeak aurkitu ahal izango dira. 

Aurten euskaraz kaleratutako liburuak ezagutu nahi badituzu, Juan Luis Zabalak egindako zerrenda kontsultatu dezakezu hemen.  

DURANGOKO AZOKA

Durangoko Azokaren 52. edizioa hastera doa. Sormenaren Lurraldeak, bihar, goizeko 10:15ean zabalduko ditu ateak. Abenduaren 6tik 10era, 10:30etik 22:00etara zabalik egongo da Landako Azokagunea.

400 nobedade, 240 stand eta 200 kultur ekitalditik gora izango ditugu Kultur plaza honetan.         

Sormenaren Lurraldea DA! leloarekin, kultur eragile guztiak batzen dituen espazio moduan agertu eta bertan ematen diren istorioak, ikuskizunak, abenturak... aldarrikatu nahi ditu Azokak.

Aurtengo kartelaren egilea Jose Antonio Sistiaga margolaria da. Irudiak "unibertsoaren sorrerara egindako bidaia" iradokitzen du. 

                                              Azokako orrira joateko argazkian klikatu

                                                                  

KULTURA BONUA SALGAI

Abenduaren 4tik aurrera 8.854 Kultura Bonu jarri dira salgai Gipuzkoako 51 dendetan. 

• Gipuzkoako 20 herritan erosi ahal izango dira.
• Bonuak, diskoak eta DVDak erosteko, horietatik 2.542 euskarazko `produktuak erosteko, eta 5.312 beste hizkuntzetakoak erosteko. 
• Euskarazko produktuek 12 euroko hobaria izango dute eta gainerakoek 8 eurokoa.
• Kanpainarekin bat egiten duten dendek bereizgarri bat izango dute.
• Bonua erositako denda berean erabili beharko da.
• Urtarrilaren 15 arte erabili ahal izango da. 
  
  
  
   Kanpainaren xehetasun gehiago HEMEN

ITXEKI EUSKARARI!

Bihar, Euskararen Eguna, Hondarribiko Itsas etxeko auditorioan Itxeki euskarari! lelodun argazki-mosaikoa aurkeztuko da. Horretarako egitaru polit bat prestatu du Blagan Hondarribiko Euskara Elkarteak. 

500 argazki biltzeko erronka jo zuten eta 700 badira mosaikoan parte hartu dutenak. Bistan da, Hondarribian euskaraz bizi nahi dugunak asko garela.

Hementxe duzue Hondarribiko Udalaren laguntzarekin antolatutako egitaraua. Igande goiz atsegina pasatzeko proposamen polita eta Hondarribian euskararen erabilerari beste bultzada txiki bat emateko aukera. 

ABENDUAREN 3A, EUSKARAREN EGUNA

Ostiralean Euskararen Nazioarteko Eguna ospatu genuen eskolan.  

BANAKA, BINAKA, LAUNAKA... 

MAITASUNEZ, ERAIKI EUSKARA!

                                                             
                                                             

Hori izan da gure aurtengo leloa eta euskararen eraikuntza irudikatuz, Talaia eskolan hainbat jarduera eta ekitaldi antolatu ziren Euskararen Eguna gogoratu eta indartzeko: irratsaio berezia, etxeetatik ekarritako irudiekin hormairudiak osatu, kotxeetan jartzeko txartelak egin eta kaleetan banatu, Talaia Institutukoek eskainitako CUP SONG ikuskizuna ikusi eta elkarrekin abestu... Baina eguraldiak ez zigun asko lagundu eta kalera irteteko aukera izan zuten bakarrak, Biteriko ikasleek izan ziren.
   
                               
                                                         

LIBURU AURKEZPENA KULTUR ETXEAN

Azaroaren 22an, Lola Sarratearen Lolita liburuaren aurkezpena izango da Hondarribiko Kultur Etxean, 19:30ean. Liburua 49 kontakizunek osatzen dute, Baztanen bizitutako bere lehen hamabi urteak abiapuntu direlarik. Informazio gehiago Berrian eta Radiokulturan (idazlearen audioa) aurkituko duzue.