Urtero, udaberrian, Boloniako Haur Liburuen Azoka ospatzen da.
Haurrentzako produkzioaren arloan nazioarteko azoka nagusia da Boloniako
hau.
Aurten ordea, azoka ez da ohikoan bezala ospatu, ekitaldi asko bertan behera geratu dira eta beste asko modu birtualean eraman dituzte edo eramaten ari dira aurrera.
Azokako "museoan" gure etxetik sar gaitezke eta ikusi hainbat nobedade eta erakusketa. Guk ilustrazioen galeria aukeratu dugu bisita egiteko. Irudian sakatuta ilustratzaileen lan desberdinak ikus ditzakegu.
Liburuaren Egunean egindako gonbidapenari erantzunez jasotako ekarpenak bildu ditugu bideo honetan.
Eskerrik asko egin duzuen ahaleginagatik, eta Liburuaren Eguna gaur, bihar... eta egunero izatea nahi dugulako, nahi duzuenean bidali zuen proposamenak Mediatekara, hementxe izango duzue leiho bat zabalik eta!
Jolas-gune honetan era desberdinetako denbora-pasak aurkituko dituzue, baita eskulanak egitego ideia asko ere. Webgune honek Aiurri Txiki aldizkarian argitaratutako jolasak ditu abiapuntu.
Irudian sakatu aukerak ikusteko. Sartu eta ondo pasa!
Miren Irurzunek eta Itziar Ziemkiewiczek, ama-alabak, Tengo un volcán ipuinaeuskaratu eta kontakizuna ondorengo bideoan grabatu dute.
Tengo un volcán (Carambuco ediciones) liburuarenegileak Míriam Tirado eta Joan Turu dira. Sumendi bat daukat istorioan,barruan daukagun amorrua nola bideratu dezakegun kontatuko digu Mirenek.
Lau asteko zientzia eta teknologia-erronkak proposatu ditu. Astelehenetik ostegunera erronkak izango dira egunero, eta, ostiraletan, ikertzaile gazte batekin solasaldia.
Apirileko egutegia bezala, hau ere dinamikoa da. Nahi den esperimentuan klikatu eta dokumentu bar irekitzen da argibide guztiekin.
Orokorrean 10-15 urte bitarteko gazteei zuzendutako ekintzak dira, baina familian zientzia eta teknologia-jarduerak bultzatzeko asmoz, gurasoak haur txikiagoekin ere erronkak egitera gonbidatu nahi dira.
Tartaloren kondaira kontatuko digute Jokin Mitxelenak eta Aitziber Salinasek. Salinasek kondaira kontatzen duen bitartean, Mitxelena irudiak marrazten joango da, istorioa irudikatuz.
Tartalo gure mitologiako jeinu gaizto bat da. Begi bakarreko gizon erraldoi hau, lanbidez artzaina da. Herrietako gazteak bahitu eta jan egiten ditu inguruetan izua eraginez.
Aho-korapiloekin jolasean. Ezetz hogei aldiz trabatu gabe esan!
Mihia askatu eta hitzekin jolasean jarraitu nahi baduzu, ondoren dituzu liburu dibertigarri batzuk. Barruan igarkizunak, aho-korapilo pilo bat, olerki motzak eta umorezko testuak aurkituko dituzu.
Hitzaren giltza, hitzaren giltza, ahoa ireki eta elkarrekin mintza
Karolina eta Naia Sainz de Bikuñak, ama-alabak, Euskalerria irratiko Etxeko ipuhinak tarterako grabatu zituzten bi audio-ipuin luzatu dizkigute eta zuekin partekatu nahi izan ditugu.
Bi ipuin hauek entzun ondoren, ziur gaude gehiago entzuteko gogoa piztuko zaizuela. Bada, etxeko-ipuhinak estekan sakatu eta beste ipuin asko entzuteko aukera izango duzue. Sartu eta gozatu!
Apirila liburuaren hilabetea da. Hilaren 2an hasi, Haur Liburuaren Nazioarteko Egunarekin, eta 23an bukatu, Liburuaren Nazioarteko Egunarekin. Bi egunak ezohiko moduan ospatu ditugu, etxean.
Egun batzuk pasa beharko dira oraindik, liburutegi, liburu-denda eta azoketan murgiltzeko.
Baina horrela izanda ere, bidaiatzen jarraituko dugu eskura ditugun liburuekin, sarean eskuratu ditzakegunekin eta guk asmatutako istorioekin.
Urtero eskolan jarduera desberdinak antolatzen ditugu Liburuaren Egunaren inguruan. Aurten etxeetatik parte hartzeko gonbidapena egin dizuegu. Liburuak partekatzeko uneak bilatu eta bidali zuen audioak, bideoak edo argazkiak. Zuen ekarpenen zain gaude.
Bilbo Arte Ederren Museoak artearekin gozatzeko soinu-dokumentuak egin dituzte 5 eta 10 urte bitarteko haurrentzat. Bildumako hainbat artelanetan inspiratutako kontakizunak dira.
"Kontatu nahi dizugu nola aurkitu zuen haizeak bere etxea, nola egiten dituen klimak argiak, gorriz jantzitako emakumearen istorioa... "
Museoko webgunean familian jarduteko bestelako proposamenak ere aurkituko dituzue, adibidez, margotzeko irudi-sorta bat bertako bildumako pinturak abiapuntutzat hartuta, edo artelanekin jolasteko App-a.
Egun arraro hauetan, etxean gauden hauetan, leihoek protagonismo handia hartu dute. Bizilagunak hortxe ditugu, hurbil, baina leihoetan edo balkoietan baino ez ditugu ikusten. Eta etxe barruan, hormen atzean zer gertatzen da?
Liburu honen bidez, modu umoretsuan, hainbat bizilagunen etxeetara sartuko gara.
ARRAROA
Idazlea: Ainara Azpiazu "Axpi"
Ilustratzailea: Paula Estevez
PAMIELA, 2017
Kalandraka-Pamiela kanalean, Ainara Azpiazu "Axpi"-k, berak idatzitako liburua ekartzen digu gogora. Egun hauetako egoerarekin liburuak duen antzekotasunagatik aukeratu du eta besteekiko ditugun uste eta aurreiritziaz hausnartzeko gonbidapena egiten digu.
Zer pentsatua emango digu liburuak, elkarrekin irakurtzeko eta solasteko aukera polita!
Bertso ikasgelatik jaso ditugu Maddalen Arzallusek leihotik begira udaberriari jarritako bertsoak. Esteka horretan bertsoak entzuten eta egiten ongi pasatzeko hamaika proposamen aurkituko dituzu.
Atzo ospatu zen Haur Liburuen Nazioarteko Eguna, Hans Christian Andersenen jaiotegunean. Badakigu duela 215urte jaio zen idazlea munduko ezagunenetakoa dela. Haurrentzako ipuin asko idaztzi zituen, baina bestelako testuaka ere, eleberriak, poemak eta bidai liburuak, besteak beste.
Bere ipuinak, ziurrenik, sarritan irakurri ditugu, askotan bertsioak, eta pelikulak ikusi ditugu horien egokitzapenak eginez: Sirenatxoa, Ahatetxo itsusia, Berunezko soldadutxoa...
Baina badakizue? Andersenek bazuen zaletasun handi bat... paperezko figurak moztea, ebakigarriak egitea!! Bai, beti eramaten zituen guraizeak berekin eta edozein paperekin (kontzertu bateko egitaraua, eskutzitz bat...) irudi zainduak mozten zituen.
Ipuinak kontatzen zituen bitartean paper-siluetak mozten zituen. Haurrek (eta ez hain gazteek ere) guraizeen mugimenduari jarraitzen zieten ipuinak entzuten zituzten bitartean eta bukatzean, Andersenek, eskuetan zeukan ebakigarria zabaltzen zuen entzuleak liluratuz.
Sorkuntza libreko joko horretan autoerretratuak, tximeletak, dantzariak, ekialdeko jauregiak, eszenatokiak... sortu zituen.
Egindako ebakigarriak oparitu egiten zituen eta horietako asko Hans Christian Andersen museoan jasota daude.
Ondoren dituzu idazleak egindako hainbat ebakigarri :
1967. urteaz geroztik, apirilaren 2an, Hans Christian Andersen jaio zen egunean hain zuzen ere, IBBYk Haur Liburuaren Nazioarteko Eguna antolatzen du, haur eta gazteentzako kalitatezko liburuak bultzatzeko eta gazteen artean irakurtzeko zaletasuna sustatzeko.
Urtero IBBYren atal nazional batek hartzen du eguna sustatzeko ardura. Honek bere herrialdeko idazle bat eta ilustratzaile ezagun bat hautatzen ditu mundu osoko haurrei bidaltzen zaien mezua eta kartela egin dezaten eta liburutegietan, ikastetxeetan, liburu-dendetan... ospakizuna susta dezaten.
Aurten, Esloveniari egokitu zaio. Kartela Damijan Stepančičilustratzaileak egin du eta Peter Svetina idazleak Hitz-goseak testua idatzi du. Haren hitzek, Xabier Mendigurenek itzuliak, olerkiak eta istorioak irakurtzera bultzatzen gaituzte, hitzak asebetetzeko.
Mezuaren bukaera aldera galdera bat agertzen da:"Hala ere, ba ote da itxaropenik gose hau hitzen bidez inoiz asebete ez dutenentzat?". Erantzuna jakiteko, mezu osoa irakurtzera animatzen zaituztegu:
HITZ GOSEA
Ni bizi naizen tokian, zuhaixkak apirilaren amaieran edo maiatzaren hasieran berdetzen dira. Handik gutxira, tximeleta-krisalidaz betetzen dira, eta kotoizko bolatxoak edo azukre-kotoiak ematen dute. Pupek hostoz hosto irensten dituzte zuhaixkak, biluzik utzi arte. Garatzen direnean, tximeletak hegan ateratzen dira, baina zuhaixkak ez dira suntsituta geratzen. Uda iristean, berriro berdetzen dira, eta horrela behin eta berriz. Hori idazlearen irudi da, poetaren irudi. Idazten dituzten istorioek eta poemek barrua janda, ahituta, odolustuta uzten dituzte idazleak, eta, amaitu ondoren, beren hegaldiari ekiten diote istorio eta poema horiek, liburuetara erretiratu eta irakurleak aurkituz. Etengabe errepikatzen da hau. Eta zer gertatzen da istorio eta poema horiekin? Ezagutzen dut begietan ebakuntza egin behar izan zioten mutil bat. Ebakuntza egin ostean, bi astez eskuineko aldera bakarrik utzi zioten etzaten, eta ondoren, beste hilabete batez ezin izan zuen ezer irakurri. Hilabete eta erdi geroago, berriro liburu bat hartu zuenean, hitzak katilutik koilara batez biltzen ariko balitz bezala sentitu zen, haiek jaten ari balitz bezala. Benetan, jaten. Eta ezagutzen dut orain irakasle den neska bat. Esan zidan: gurasoek libururik irakurtzen ez zieten haurrak pobretuta daude. Hitzak poemetan eta ipuinetan elikagai dira. Ez gorputzaren elikagai, ez zure urdaila bete dezakeen elikagai. Espirituarentzat eta arimarentzat dira elikagai. Norbait gose edo egarri denean, urdaila uzkurtu eta ahoa lehortzen zaio. Jateko zerbait bilatzen du, ogi-puska bat, plater bat arroz edo arto, arrain edo platano bat. Zenbat eta gose handiagoa izan, orduan eta mugatuagoa haren ikuspegia; ez du ikusten ase dezakeen janaria besterik. Hitz-gosea, ordea, beste era batera agertzen da: goibeltasun, ezjakintasun, harrokeria gisa. Horrelako gosea dutenak ez dira ohartzen arima hotzikarek hartua dutela, euren ondotik igarotzen ari direla konturatu gabe. Beren munduaren zati bat urrunduz doakie oharkabean. Gose-mota hori asetzen dute poemek eta istorioek. Hala ere, ba ote da itxaropenik gose hau hitzen bidez inoiz asebete ez dutenentzat? Bai, bada. Mutil hark ia egunero irakurtzen du. Maistra den neskak ipuinak irakurtzen dizkie ikasleei, ostiralero, astero. Inoiz ahazten bazaio, haurrek berehala gogorarazten diote. Eta zer gertatzen da idazlearekin, poetarekin? Uda iristean, berriro berdetuko dira. Eta berriro ere, barrena jango diete beren istorioek eta poemek, gero norabide guztietan irtengo direlarik hegan, behin eta berriz.
Egun hauetan, gure etxetik, Tolosako Topic txotxongilo museora bisita birtuala egin dezakegu www.topictolosa.comhelbidean sartuta. Bisitaz gain, egun hauetarako bi proposamen nabarmendu nahi ditugu: PLATOPIC eta MUSEOKO PERTSONAIEI BISITA GIDATUA. Egunero, astelehenetik ostiralera, txotxongiloak egiteko tailer bat eskaintzen digute eta museoko txotxongilo panpin bat aurkezten digute.
Asmatu edo entzun dituzuen ipuin edo istorioak etxekoei kontatzeko aukera eder bat izan daiteke txotxongilo ikuskizun bat prestatzea. PLATONIC bideo proposamenetan makina bat ideia dituzue.
Etxean solte ditugun galtzerdi horiekin, adibidez, begira zer egin dezakegun!
Maite Franko ipuin kontalariak etxean familia arteko giroan ipuinak sortzeko ariketa bat erakusten digu ondorengo bideoan: Gianni Rodariren BINOMIO FANTASTIKOA. Baina hori ez da egiten digun proposamen bakarra, grabazioaren bukaeran erronka bat luzatzen digu, jakin nahi zer den? Ikusi bideo polit hau eta parte hartu!!
Ibai beti dago kezkatan. Kapeluek eta zapatek kezkatzen dute. Hala berean kezkatzen dute hodeiek, euriak eta txori erraldoiek. Bere amona ere, neskatoa zelarik, kezka batean bizi zen, horregatik daki nola lagundu behar dion bilobari.
Beste kultura baten ateak zabaltzen dizkigun sinboloa dira Kezkamuxelak izeneko mamuxela edo panpina bereziak. Aspaldi du Guatemalako haurrek panpinok egiten dituztela txotxez, zatartxoz eta hariz; lotarakoan beren kezkak kontatzen dizkiete eta burukoaren azpian uzten dituzte, biharamunean kezkarik gabe jaiki ahal izateko.
Etxeko apalategian baduzu? Hala ez bada, eta Mediateka ireki bitartean, azpiko bideoan ikusi eta entzun dezakezu ipuina.
Kezkamuxelak Anthony Browne
Gustatu al zaizu? Eta zure panpintxo propioak sortuko bazenitu? Zotzak, pintza txikiak, paperak, pipa garbitzaileak, kolore desberdinetako oihalak eta koloretako hariak (edo eskura dituzun beste materialak) erabili ditzakezu zure pena-kentzaileak egiteko eta egin ondoren, badakizu, kezkak hari kontatu, eta lotara joatean, burkoaren azpian jarri. ONDO LOIN!!
Elhuyarrek etxeko txiki eta gazteenekin etxean esperimentuak egiteko gonbidapena ekarri dugu gure blog-era.
#NikEtxeanEsperimentuak egutegia sortu du COVID-19aren hedapenaren eraginez etxean isolamendu egunak arintzeko, eta, bide batez, zientziaren inguruko kontzeptu desberdinak modu dibertigarrian familiartean ikasteko.
Egutegi dinamikoa etxeko txiki eta gazteei zuzenduta dago. Bertan, nahi den esperimentua klikatu eta dokumentu bat irekitzen da, argibide guztiekin.
Proposatzen diren esperimentuak etxean izan ditzakegun material eta tresnekin egingarriak dira; apirileko egun bakoitzerako bi esperimentu proposatzen dira: bata (H) haurrei zuzenduta dago, eta bigarrenak, berriz, gazteei (G) egiten die proposamena. Esperimentu bakoitzari dagokio estekan sakatuz, esperimentua egiteko argibide guztiak dituen dokumentua zabaltzen da.
Esperimentuen emaitzak edo iradukizunak konpartitu nahi duenak #NikEtxeanEsperimentuak traola erabili dezake sare sozialetan zabaltzeko.
Beraz, badugu zer esperimentatu eta partekatu etxeko txiki eta gazteekin. Animatu!!
Ipuin bat entzun nahi? Sakatu beheko irudian eta ipuin mordoa topatuko duzue bertan!
Ipuin laburrak, mikroipuinak, poemak, liburu osoak edo horien pasarteak topa daitezke www.etxegiroan.com atarian. Helduentzat, gazteentzat eta umeentzat prestaturiko lan horiek euskaraz zein gaztelaniaz entzun daitezke.
Igandean, martxoaren 21ean, Poesiaren Eguna izan zen. Horren harira, haurrekin irakurtzeko eta irudiekin gozatzeko, bi poema liburu eder aukeratu ditugu: Xomorropoemak eta Piztipoemak (PAMIELA).
Xomorropoemak eta beste piztia batzuk, txikitxoentzat edo poesian hasiberrientzat pentsatua dago eta Piztipoemak eta beste xomorro batzuk, irakurle pixka bat helduagoei zuzendua dago, Xomorropoemei jarraipena emateko.
Poemak xomorroak bezala, ustekabean agertzen dira. Eta ziztatu egiten dute. Eta kosk. Eta azalean koskor txikiak utzi, egunetan joaten ez direnak.
Gabonetako oporrak gainean ditugula, ez ahaztu, mediatekako irakurle maiteok, liburu-titulu batzuk jartzea Olentzerori bidaliko diozuen gutunean.
Eskola Liburutegietako taldeak egindako gida txikian dauden gomendioak lagungarri izan daitezke aukeratzeko garaian. Ikusteko sakatu argazkiaren gainean.
Joan den larunbatean, abenduak 14, Berria egunkarian argitaratutako artikulu interesgarri bat ekarri dugu hona.
Haurrei ipuinak kontatzearen garrantziaz hitz egiten digute bertan, haur literaturan eskarmentu handia duten, Pello Añorga eta Maite Franko, idazle eta ipuin kontalariak, eta Juan Carlos Alonso psikologoak.
Ipuina bera baino gehiago, ipuina kontatzeko espazioaren eta momentuaren garrantzia nabarmendu dute hiru adituek.
Haurrei ipuinak kontatzeak balio du ondo pasatzeko, helduen eta haurren arteko harremanak estutzeko, haurrak bere barne mundua garatzeko, irudimena askatzeko, ahozkotasuna lantzeko, eguneroko zurrunbiloan eten bat egiteko... Ekintza sinplea da, baina zaindu beharrekoa.
Jakes Goikoetxearen Ipuinezko zilbor heste bat erreportajea irakurtzen hemen jarraitu dezakezu.
Gaurtik igandera arte ospatuko da "XXIV. Euskal Liburu eta Disko Azoka", Hondarribiko
Arrantzale auzoan. Durango azokan aurkeztutako berritasunak eta bildutako eskaintza nagusiak ezagutzera emango ditu euskal kulturara dedikatutako guneak.
Gaur, hilak 12, 12:00etan, Udaletxeko batzar-aretoan,
prentsaurrekoa egingo da azoka aurkezteko, eta Josu Zabaleta idazleak
«Hondarribi» saria jasoko du.
Asteburuan, Jon Arretxe idazleak bere lanak sinatzen egongo da azokan.
Gaur, azaroak 13, 3. eta 4. mailako ikasleek Oker filma ikusteko aukera izan dute Itsas Etxeko Auditoriumean "Euskara zine aretoetara, Tinko" programaren barruan.
Stuart McDonald-ek zuzendutako film australiarra da Oker.
Etengabeko azeri-erasoek ixteko arriskuan jarri dute Australia hegoaldeko herrixka bateko erakarpen turistiko nagusia -Pinguino Txikien uharte bat-. Oiloak hazten dituen baserritar xelebre batek bilobarekin bat egin du eta pinguinoak salbatzeko metodo bitxia jarri du martxan... aitonaren artzain-txakur bihurrie eta bazter-nahaslea. Benetako istorio batean oinarritutako filma.
LIBURUA HARTU, orriek duten usain berezia sentitu, begiak entretenitzen hasi lerroz lerroko bidean aurrera. Parke batean paseatzen goazenean bezala. Edo itsasora irtendakoan... Bidai baten hasiera da liburu bat. Badakigu zer utzi dugun atzean; baina bukaeran zer aurkituko dugun, nekez.
Anjel Lertxundi, Hain eskura Irakurri, hamaika idazki literario irakurtzeari buruz
Joan den ostiralean, maleta bidaiariak hirugarren mailako ikasleen etxeetara bidaiatzen hasi ziren.
Barruan dagoen materiala etxekoek elkarrekin jarduteko eta gozatzeko pentsatua dago: elkarrekin irakurri, kontatu, jolastu... iritziak eta gustu desberdinak partekatuz.
Esperientziarekin guztiok gozatuko dugulakoan gaude. Zuen bizipenak maletan aurkituko duzuen koadernoan kontatzea ez ahaztu!!
MILA ESKER bidaian parte hartuko duzuen familia guztiei!!
